ՅՈՒՇԱՐԺԱՆ ՊԱՀԵՐ
  • Ո՜վ ցաւագին Տիրամայր, ահա քու առջեւդ կը խոնարհիմ իբր խեղճ մեղաւոր: Ընդունէ՛ աղօթքներս եւ արցունքներս:
    Ողջոյն քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, հոգիս յուսահատ է եւ կարիքներու բեռին տակ կքած: Զօրացո՛ւր եւ մխիթարէ` զիս զաւակդ: Կը սիրեմ քեզ եւ կը պաղատիմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, սրտիս մէջ կը ծագի յոյսը՝ թէ զիս պիտի լսես անպայման: Այս է շնորհքը (...) որ կ'ակնկալեմ քեզմէ եւ ամբողջ սիրտս կը նուիրեմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ամէն:

  • Տէր Յիսուս, Երանելի Իգնատիոս Մալոյեանը Քեզ շատ սիրեց իր կեանքին ընթացքին ու յաճախ դիմեց Քեզի արտասանելով Քու Ս. Անունդ։ Ան՝ իր կեանքն ալ զոհեց Քու սիրոյդ եւ ժողովուրդիդ փրկութեան համար՝ յանձն առնելով չարչարանքներն ու մարտիրոս- ութիւնը։ Շնորհէ՛ մեզի, ո՜վ Տէր, անոր բարեխօսութեամբ, հետեւեալ շնորհքը..., զոր Քեզմէ կը խնդրենք, որպէսզի կարենանք հետեւիլ անոր օրինակին, նմանիլ անոր առաքին- ութիւններուն եւ տեսնել օր առաջ անոր պսակումը փառքով, զոր Եկեղեցին կը շնորհէ սուրբերուն։ Ամէն։
    Հայր մեր... Ողջոյն քեզ... Փառք Հօր...

Հ. Հ. Վարչապետի պաշտօնակատար՝ Վսեմաշուք Տիար Նիկոլ Փաշինեան Զմմառու Վանքին մէջ

    Կիրակի, 21 Հոկտեմբեր 2018-ի, յետմիջօրէի ժամը 2:30-ին, Զմմառու մայրավանք ժամանեց Հ. Հ. Վարչապետի պաշտօնակատար՝ Վսեմաշուք Տիար Նիկոլ Փաշինեան, ընկերակցութեամբ բազմանդամ պատուիրակութեան մը, գլխաւորութեամբ՝ արտաքին գործոց նախարարի պաշտօնակատար Զոհրապ Մնացականեանի:

    Շքախումբին դիմաւորեցին Զմմառու Պատրիարքական Կղերի Միաբանութեան Վարչութիւնը ի դէմս Զմմառու Վանքի Մեծաւոր եւ Պատրիարքական Փոխանորդ՝ Գերպծ. Գաբրիէլ Թ. Ծ. Վ. Մուրատեանի, Պէյրութի Հայ Կաթողիկէ Պատրիարքական Թեմի Առաջնորդ՝ Արհիապատիւ Գէորգ Եպս. Ասատուրեան, Լիբանանի Կաթողիկէ Հայոց հոգեւորական դասը, Անարատ Յղութեան Միաբանութեան առաքինազարդ քոյրերը, Զմմառեան Միաբանութեան՝ Ս. Միքայէլ ընծայարանի նորընծաներն ու Երանելի Իգնատիոս Մալոյեան Դպրեվանքի ժառանգաւորներն ու կիսասարկաւագները, պետական երեսփոխան Ժան Թալուզեան եւ հայ կաթողիկէ կառոյցներու եւ հաստատութիւններու ներկայացուցիչներ:

  Շքախումբը այցելեց նախ Զմմառու Ցաւագին Տիրամօր մատուռը, ուր Ս. Միքայէլ ընծայարանի նորընծաներն ու Երանելի Իգնատիոս Մալոյեան Դպրեվանքի ժառանգաւորներն՝ Երանելի Նահատակ Իգնատիոս Մալոյեանի երգը հնչեցուցին: Ապա ուղղուեցան դէպի Մայրավանքի Վերափոխեալ Աստուածամօր Եկեղեցին, ուր Վսեմաշուք Տիար Նիկոլ Փաշինեան եւ իր տիկինը՝ Աննա Յակոբեան մօմ մը վարեցին ի պատիւ Սրբոյ Կուսին:
  Մայրավանքի դահլիճին մէջ, Գերպծ. Գաբրիէլ Թ. Ծ. Վ. Մուրատեան Տանն Կիլիկիոյ Կաթողիկէ Հայոց Տէր Գրիգոր Պետրոս Ի. Կաթողիկոս Պատրիարաքի անունով ներկաներուն ողջունելէ ետք, հակիրճ ձեւով զեկուցեց Միաբանութեան անցած պատմական ուղիի, անոր կանոնական բնոյթի, 270 տարիներուն ծաւալած գործունէութեանը, Լիբանանի քաղաքաշինութեան մէջ ունեցած ներդրումին ընդհանրապէս եւ մասնաւորապէս Լիբանանահայութեան կրած բազմաթիւ հոգերը ամոքելու առումով, ներկայիս արձանագրած նուաճումներուն եւ ձեռքբերումներուն:

 «Այսօր համայն հայութիւնը, ըսաւ Գերապայծառը, ուրախ է, ի տես մեր Հայրենիքի յառաջդիմութեան և հզօրացման: Մայր Հայրենիքի հզօրացումն ու ապահովութիւնը մեր առաջնահերթ մտահոգութիւնն է»: « Միջին Արեւելքի արհաւիրքներէն ու պատերազմներէն, կրօնական ծայրայեղական շարժումներէն ու քրիստոնէութեան դէմ հալածանքներէն փախուստ տալով,  աւելցուց ան, աշխարհասփիւռ հայութիւնը այսօր դարձեալ կը համխամբուի Մայր Հայրենիքի շուրջ, Հայոց Պետութեան հովանիին ներքոյ՝ ի խնդիր խաղաղաւէտ կեանքի: Հայրենիք-Սփիւռք համագործակցութեան շրջագիծէն ներս, զգալի ձեռքբերումներ արձանագրուած են ցարդ՝ զօրացնելով Հայաստանն ու Արցախը և Սփիւռքի ազգային կեանքը: Միաժամանակ Հայրենի Պետութեան կողմէ ալ ջանքեր պակաս չեն եղած՝ ամրապնդելու հայրենիքի և սփիւռքի կապերն ու համագործակցութիւնը և աջակցելու Սփիւռքի հայկական բոլոր կազմակերպութիւններուն և համայնքներուն հետ»:

 «270 տարիներու ընթացքին, ըսաւ Գերապայծառ Մուրատեան, Միաբանութեանս գլխաւոր առաքելութիւնը եղած է հայ հոգեւորականներու պատրաստութիւնն ու աշխարհով մէկ ցրուած հայկական թեմերը որակեալ կղերներով ապահովելը: Ասոր կողքին, Միաբանութիւնս լուրջ աշխատանքներ կատարած է հայապահպանմանն ու հայագիտութեան զարգացման ուղղութեամբ»:
    Ան աւելցուց թէ. «Մեծ Եղեռնի դաժան օրերուն Միաբանութեանս Կղերը՝ իր ժողովուրդի կողքն էր. Մարտինի Թեմի Առաջնորդ՝ Երանելի Իգնատիոս Արք. Մալոյեանը իր հաւատակից միաբաններով իյնկան վասն հայրենեաց եւ հաւատքի: Ցեղասպանութենէն հազիւ Ճողոպրած եւ Լիբանան ապաստանած հայութեան բեկորներուն առաջին օգնութեան ձեռք մեկնողը Զմմառու Միաբանութիւնը հանդիսացաւ: Պէյրութի շրջակայքը տեղափոխուած գաղթական հայերուն ապաստան տալու միտումով, Զմմառու Միաբան հայրերէն Գերյ. Պօղոս Արիս Պէյրութէն դուրս հիմնեց Պուրճ-Համուտ հայկական աւանը, որ յետագային դարձաւ Պէյրութի անբաժան մասը եւ դարձաւ անոր առաջին քաղաքապետը, իր աւանդը բերելով ոչ միայն հայերու պատսպարման, այլեւ Լիբանանի քաղաքաշինութեան կարեւոր գործին»:
    Անդրադառնալով Միաբանութեան մշակութային ներդրումի մասին, Գերպծ. Գաբրիէլ Մուրատեան ըսաւ թէ. «Մշակութային առումով, եւս կատարուած են բազմաթիւ աշխատանքներ: ըլլան անոնք տպագիր գործերու՝ գիրքեր, պարբերականներու տեսքով, ըլլան բանաւոր խօսքի՝ դասախօսութիւններ, դաստիարակչական դասընթացքներու տեսքով: Միաբանութիւնս աշխարհի չորս ծագերէն հաւաքագրած եւ անդառնալի կորուստէ փրկած է բազմաթիւ հայկական հին ձեռագիր մատեաններ, արխիւային բնոյթի կարեւոր փաստաթուղթեր, յիրաւի դառնալով աշխարհի հայագիտական 5-րդ կեդրոնը»:
    Ապա հայրենիքի հետ մշակուած ծրագրերու շուրջ անդրադառնալով Գերապայծառ Մուրատեան խօսքը եզրափակեց ըսելով. «Մեր ցանկութիւնն է, որ Հայաստանի Հանրապետութեան եւ Զմմառու Պատրիարքական Կղերի Միաբանութեան միջեւ փոխյարաբերութիւնները հասնին բաղձալի մակարդակի եւ Ձեր Վարչապետի պաշտօնին վերընտրման պարագային այս յարաբերութիւնները կը ստանան բնականոն տեսք եւ մեր համագործակցութիւնը կը հասնի լիարժէք ու ցանկալի աստիճանի, որպէսզի մեր ազգը յաւէտ խոյանայ դէպի յաւերժութիւն, դէպի մեր ցայսօր անկատար իղձերու եւ երազներու իրագործում՝ ի փառս Հայ Եկեղեցւոյ եւ Ազգին»:
    Ողջոյնի Խօսքէն ետք, Գերպծ. Գաբրիէլ Թ. Ծ. Վ. Մուրատեան Հ. Հ. Վարչապետի պաշտօնակատար Տիար Ն. Փաշինեանի պատմական այցելութեան ի պատիւ՝ Զմմառու Պատրիարքական Կղերի Միաբանութեան անունով «Զմմառու Ցաւագին Տիրամօր» գեղակերտ լուսանկարը նուիրեց:
    Հ. Հ. Վարչապետի պաշտօնակատար Տիար Ն. Փաշինեան իր կարգին իր ուրախութիւնն ու երջանկութիւնը յայտնեց ջերմ ընդունելութեան համար եւ բարձր գնահատեց Զմմառու Պատրիարքական Կղերի Միաբանութեան տարած աշխատանքները բոլոր բնագաւարներու մէջ, եւ յառաջիկային հայրենիք Զմմառ համագործակցութեան ուրուագծով եւ լուսաւոր ապագայի խոստումնալից տեսլականով եզրափակեց խօսքը:
    Այնուհետեւ պատուոյ հիւրերը մօտէն ծանօթացան զանազան համալիրի բաժանմունքներուն, սկսելով թարգարանէն, ապա մատենադարանը, ձեռագրատունը եւ գինեմարանը:
Խորապէս տպաւորուած՝ շքախումբը Վանքէն հրաժեշտ տուաւ:
                                                                                                                                                               

 

                                                                                                        Դիւան Զմմառու Վանքի

ԳԼԽԱՒՈՐ ԼՈՒՐԵՐ

  • Զմմառու Պատրիարքական Կղերի Միաբանութեան Փոխանորդի այցելութիւնը Հայաստան
    Զմմառու Պատրիարքական Կղերի Միաբանութեան Փոխանորդի այցելութիւնը Հայաստան

    Զմմառու Պատրիարքական Կղերի Միաբանութիւնը իր հիմնադրութեան օրէն՝ նուիրուեցաւ հայ ժողովուրդին ծառայութեան և իր բաժինը բերաւ հոգեւոր սնունդ մատակարարելով Մայր Հայրենիքի և Սփիւռքի Կաթողիկէ Հայոց:

  • Էմմանուէլ Արք. Տապպաղեան ոչ եւս է
    Էմմանուէլ Արք. Տապպաղեան ոչ եւս է

    Ողջոյն քեզ Սուրբ Եկեղեցի։ Ողջոյն քեզ սեղան սրբութեան։ Ողջոյն ձեզ դասք քահանայութեան։ Ողջոյն ձեզ հաւատացեալ եղբարք իմ ի Քրիստոս։ Ողջոյն ձեզ համօրէն ժողովրդականք։ Ես ճանապարհորդեցի առ Արարիչ իմ։ Ես ճանապարհորդեցի առ Քրիստոս յոյս ամենեցուն:

  •  «Ես եմ Յարութիւն և Կեանք»
    «Ես եմ Յարութիւն և Կեանք»
    Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Գրիգոր Պետրոս Ի. Կաթողիկոս Պատրիարքը, Հայ Կաթողիկէ Եպիսկոպոսաց Դասը, Զմմառու Պատրիարքական Կղերի Միաբանութիւնը և Տապպաղեան ընտանիքը, սրտի խոր կսկիծով կը գուժեն Զմմառու Պատրիարքական Կղերի Միաբանութեան անդամ եւ Պաղտատի վաստակաւոր Առաջնորդ՝ Արհի. Հ. Էմմանուէլ Արք. Տապպաղեանի վախճանումը, որ տեղի ունեցաւ Հինգշաբթի 13 Սեպտեմբեր 2018-ին, առաւօտուն, Ս. Խաչ քոյերու հանգստատան մէջ, յետ կարճատեւ հիւանդութեան: 
  • ՏՕՆ ՎԵՐԱՓՈԽՄԱՆ ՍՐԲՈՅ ԿՈՒՍԻՆ ՄԱՐԻԱՄՈՒ ԵՒ ԵՊԻՍԿՈՊՈՍԱԿԱՆ ՁԵՌՆԱԴՐՈՒԹԻՒՆ ԵՒ ՕԾՈՒՄ ԳԵՐՅ. Հ. ԵՂԻԱ Ծ. ՎՐԴ. ԵՂԻԱՅԵԱՆԻ
    ՏՕՆ ՎԵՐԱՓՈԽՄԱՆ ՍՐԲՈՅ ԿՈՒՍԻՆ ՄԱՐԻԱՄՈՒ ԵՒ ԵՊԻՍԿՈՊՈՍԱԿԱՆ ՁԵՌՆԱԴՐՈՒԹԻՒՆ ԵՒ ՕԾՈՒՄ ԳԵՐՅ. Հ. ԵՂԻԱ Ծ. ՎՐԴ. ԵՂԻԱՅԵԱՆԻ

    Կիրակի, 12 Օգոստոս 2018-ին, առաւօտեան ժամը 10:30-ին, Սուրբ Աստուածածնայ Վերափոխման տօնին, Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Գրիգոր Պետրոս Ի. Կաթողիկոս Պատրիարքը, Զմմառու վանքի «Երանելի Մալոյեան» ամփիթատրոնին մէջ, Հայրապետական Ս. Պատարագին ընթացքին կատարեց եպիսկոպոսական ձեռնադրութիւնն ու օծումը Զմմառու Պատրիարքական Կղերի Միաբանութեան անդամ՝ Հ. Եղիա Ծ. Վրդ. Եղիայեանի ՝ որպէս Առաջնորդ Ֆրանսայի Կաթողիկէ Հայոց՝ Փարիզի Ս. Խաչ Թեմի: 

View All

inside picture