նորություններ
  • Ո՜վ ցաւագին Տիրամայր, ահա քու առջեւդ կը խոնարհիմ իբր խեղճ մեղաւոր: Ընդունէ՛ աղօթքներս եւ արցունքներս:
    Ողջոյն քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, հոգիս յուսահատ է եւ կարիքներու բեռին տակ կքած: Զօրացո՛ւր եւ մխիթարէ` զիս զաւակդ: Կը սիրեմ քեզ եւ կը պաղատիմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, սրտիս մէջ կը ծագի յոյսը՝ թէ զիս պիտի լսես անպայման: Այս է շնորհքը (...) որ կ'ակնկալեմ քեզմէ եւ ամբողջ սիրտս կը նուիրեմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ամէն:

  • Տէր Յիսուս, Երանելի Իգնատիոս Մալոյեանը Քեզ շատ սիրեց իր կեանքին ընթացքին ու յաճախ դիմեց Քեզի արտասանելով Քու Ս. Անունդ։ Ան՝ իր կեանքն ալ զոհեց Քու սիրոյդ եւ ժողովուրդիդ փրկութեան համար՝ յանձն առնելով չարչարանքներն ու մարտիրոս- ութիւնը։ Շնորհէ՛ մեզի, ո՜վ Տէր, անոր բարեխօսութեամբ, հետեւեալ շնորհքը..., զոր Քեզմէ կը խնդրենք, որպէսզի կարենանք հետեւիլ անոր օրինակին, նմանիլ անոր առաքին- ութիւններուն եւ տեսնել օր առաջ անոր պսակումը փառքով, զոր Եկեղեցին կը շնորհէ սուրբերուն։ Ամէն։
    Հայր մեր... Ողջոյն քեզ... Փառք Հօր...

Տօն Շողակաթի - Վերափոխման Ս. Պատարագ Շաբաթ 13 Օգոստոս 2016-ին

Հայ Եկեղեցւոյ տօնացոյցին համաձայն՝ Շողակաթի նաւակատիքի տօնը կը կատարուի Ս. Աստուածածնի Վերափոխման տօնը կանխող Շաբաթ օրը:

Շաբաթ 13 Օգոստոս 2016-ին, երեկոյեան ժամը 19:00-ին, Զմմառու պատմական վանքին մէջ տօնախմբուեցաւ Ս. Աստուածածնի Վերափոխման տօնը: Պէյրութի Հայ Կաթողիկէ Թեմի Պատրիարքական Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վ. Մուրատեան, հանդիսաւոր Ս. Պատարագ մատուցեց եւ խաղողօրհնէք կատարեց Զմմառու վանքի նորակառոյց «Երանելի Մալոյեան» ամփիթատրոնին մէջ, արաբախօս հաւատացեալներու համար: Սուրբ և Անմահ պատարագին իրենց մասնակցութիւնը բերին Զմմառու Պատրիարքական Կղերի Միաբանութեան Արհի. Գերապայծառ Տէրեր, Գերյարգելի և Գերապատիւ Հայրեր, Զմմառու վանքի Վարչական Խորհուրդի Հայրեր, շրջակայ գիւղերու գիւղապետերն և նօտարները, Զմմառու վանքի բարեկամներ և հաւատացեալներու հոծ բազմութիւն մը: Պատարագի երգեցողութիւնը և Ս. Խորանի սպասարկութիւնը միասնաբար կատարեցին Ս. Միքայէլ, Երանելի Մալոյեան և Հռոմի Լեւոնեան վարժարանի սաները: Օրուան հանդիսութեան իրենց մասնակցութիւնը բերին նաեւ ՀԿՄ Պատանեկան Միութիւնը:
Մեծաւոր Հայրը իր քարոզին մէջ անդրադառնալով օրուան խորհուրդին, ըսաւ. «21-րդ դարու այս դժուարին օրերուն, մենք պէտք է դիմենք Ս. Տիրամօր ամենահզօր բարեխօսութեան, որպէսզի հեռու մնանք կեանքի փորձութիւններէն: Զմմառու Տիրամայրը անսասան պահած է այս սուրբ վանքը երկուքուկէս դարէ ի վեր և պիտի շարունակէ իր հովանին տարածել մեր բոլորին վրայ: Հայոց Ցեղասպանութեան 100-ամեակին առիթով, Զմմառու Պատրիարքական Կղերի Միաբանութիւնը այս ամփիթատրոնը կառուցեց ի յիշատակ Երանելի Իգնատիոս Մալոյեանին և նահատակ միաբաններուն: Այս կառոյցին կեդրոնը կանգնած՝ Երանելիին մեծ արձանը, թող ներշնչումի աղբիւր հանդիսանայ մեր բոլորին և օրինակ դառնայ մեզի, որպէսզի մենք ալ նոյն հաւատքով ապրինք: Ամէն օր կը տեսնենք ու կը լսենք մահ և աւերածութիւն, գաղթ ու սպաննութիւն, ուստի չտկարանանք մեր հաւատքին մէջ, այլ ամուր և հաստատուն մնանք: Առ այս՝ մարդ արարածը իր մէջէն պէտք է հեռացնէ մեղքը, չարի արմատները և անմարդկային արարքները, որպէսզի վերադառնայ իր խղճի անդորրութեան ու խաղաղ կեանք մը ապրի»:
Պատարագի աւարտին՝ տեղի ունեցաւ աւանդական խաղողօրհնէքը և ապա յաւուր պատշաճի հիւրասիրութիւն կատարուեցաւ վանքի ներքնագաւիթը: Ս. Աստուածածնայ Վերափոխման և վանքի անուանակոչութեան տօնին առիթով, հրավառութիւն կատարուեցաւ տօնական խանդավառ մթնորլորտի մէջ:

ԳԼԽԱՒՈՐ ԼՈՒՐԵՐ

  • Յիսուս Քրիստոսի Ս. Ծնունդը
    Յիսուս Քրիստոսի Ս. Ծնունդը

    25 դեկտեմբերի առաւօտեան ժամը 10,30-ին, Զմմառու վանքի Փոխման Ս.Կուսին Մայր եկեղեցւոյ մէջ, տեղի ունեցաւ Յիսուս- Քրիստոսի Ս. Ծննդեան պատարագը, զոր մատոյց` Զմմառու Պատրիարքական կղերի Միաբանութեան Պատրիարքական փոխանորդ, Զմմառու վանքի Մեծաւոր` Գերպծռ.Գաբրիէլ Թ.Ծ.Վ.Մուրատեանը, առընթերակայութեամբ Ս.Միքայէլ ընծայարանի եւ Երանելի Իգնատիոս Մալոյեան դպրեվանքի Տեսուչ` Գեր.Գրիգոր Վրդ.Պատիշահի:

  •  Քահանայական ձեռնադրութիւն Դամասկոսի մէջ
    Քահանայական ձեռնադրութիւն Դամասկոսի մէջ

    Շաբաթ, 21 Դեկտեմբեր 2019-ի, երեկոյեան ժամը 5 ին, Դամասկոսի Թագուհի տիեզերաց եկեղեցւոյ մէջ տեղի ունեցաւ Լեւոն Սրկ. Ստեֆանի քահանայական ձեռնադրութիւնը Ձեռամբ` Արհ.Տ.Յովսէփ Եպս.Առնաութեանի:

  • Քահանայական ձեռնադրութիւն
    Քահանայական ձեռնադրութիւն

    Շաբաթ, 14 Դեկտեմբեր 2019-ի, երեկոյեան ժամը 5 ին, Սուրբ Եղիա-Սուրբ Գրիգոր Լուսաւորիչ եկեղեցւոյ մէջ տեղի ունեցաւ` Վարդան Սրկ. Ճալլուֆի եւ Պետրոս Սրկ. Հատտատ Մարաշլեանի քահանայական ձեռնադրութիւնը:

  • «Կանչ հրեշտակապետին» 20-րդ համարը
    «Կանչ հրեշտակապետին» 20-րդ համարը

    Շաբաթ 09 Նոյեմբեր 2019-ին, լոյս տեսաւ` Սուրբ Միքայէլ ընծայարանի «Կանչ հրեշտակապետին» պաշտօնաթերթի 20-րդ համարը, ձօնուած ՝ Զմմառու Պատրիարքական Կղերի Միաբանութեան հիմնադրութեան 270 ամեակի եւ Երանելի Իգնատիոս Մալոյեանի ծննդեան 150 ամեակի զոյգ յոբելեաններուն:

View All

inside picture