նորություններ
  • Ո՜վ ցաւագին Տիրամայր, ահա քու առջեւդ կը խոնարհիմ իբր խեղճ մեղաւոր: Ընդունէ՛ աղօթքներս եւ արցունքներս:
    Ողջոյն քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, հոգիս յուսահատ է եւ կարիքներու բեռին տակ կքած: Զօրացո՛ւր եւ մխիթարէ` զիս զաւակդ: Կը սիրեմ քեզ եւ կը պաղատիմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, սրտիս մէջ կը ծագի յոյսը՝ թէ զիս պիտի լսես անպայման: Այս է շնորհքը (...) որ կ'ակնկալեմ քեզմէ եւ ամբողջ սիրտս կը նուիրեմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ամէն:

  • Տէր Յիսուս, Երանելի Իգնատիոս Մալոյեանը Քեզ շատ սիրեց իր կեանքին ընթացքին ու յաճախ դիմեց Քեզի արտասանելով Քու Ս. Անունդ։ Ան՝ իր կեանքն ալ զոհեց Քու սիրոյդ եւ ժողովուրդիդ փրկութեան համար՝ յանձն առնելով չարչարանքներն ու մարտիրոս- ութիւնը։ Շնորհէ՛ մեզի, ո՜վ Տէր, անոր բարեխօսութեամբ, հետեւեալ շնորհքը..., զոր Քեզմէ կը խնդրենք, որպէսզի կարենանք հետեւիլ անոր օրինակին, նմանիլ անոր առաքին- ութիւններուն եւ տեսնել օր առաջ անոր պսակումը փառքով, զոր Եկեղեցին կը շնորհէ սուրբերուն։ Ամէն։
    Հայր մեր... Ողջոյն քեզ... Փառք Հօր...

Աւագ Շաբթուայ արարողութիւնները Զմմառու Վանքին մէջ

Ոտնլուայ և Համապատարագ
Աւագ Հինգշաբթի 13 Ապրիլ 2017-ին, յետմիջօրէի ժամը 16.00-ին, Զմմառու վանքի Մայր Տաճարին մէջ, տեղի ունեցաւ Ոտնլուայի արարողութիւնը,

ի յիշատակ Քրիստոսի Առաքեալներուն ոտքերուն լուացումին: Այս հոգեպարար աղօթքները յօրինած է Ս. Եփրեմ Ասորին և ԺԲ. դարուն Գրիգոր Վկայասէր Կաթողիկոսը այս աղօթքները թարգմանած է հայերէնի: Ոտնլուայի արարողութիւնը կատարեց մայրավանքի ընդհանուր մատակարար և դպրեվանքի տեսուչ՝ Հ. Բարսեղ Վրդ. Պաղտասարեան: Այնուհետեւ յաւուր կարգի Համապատարագ մատուցուեցաւ ի յիշատակ Վերնատան մէջ կատարուած Յիսուսի և իր Առաքեալներուն Վերջին Ընթրիքին: մասնակցութեամբ Զմմառու վանքի վարչական Հայրերուն, դպրեվանքի «Ս. Միքայէլ» և «Երանելի Մալոյեան» դպրեվանքերու ուսանողներուն, ինչպէս նաեւ բարեպաշտ հաւատացեալներու:

Խաւարման Գիշեր
Աւագ Հինգշաբթի 13 Ապրիլ 2017-ին, գիշերուայ ժամուն, Խաւարման կարգ տեղի ունեցաւ վանքիս մայր եկեղեցիին մէջ, նախագահութեամբ՝ Զմմառու Պատրիարքական Միաբանութեան Փոխանորդ և վանքիս Մեծաւոր՝ Գերպծ. Հ. Գաբրիէլ Թ.Ծ.Վ. Մուրատեանի, մասնակցութեամբ վարչական Հայրերուն, դպրեվանքի «Ս. Միքայէլ» և «Երանելի Մալոյեան» դպրեվանքերու ուսանողներուն, ինչպէս նաեւ բարեպաշտ հաւատացեալներու: Հայ Եկեղեցւոյ տօնացոյցին համաձայն՝ Աւագ Հինգշաբթի օրուան Խաւարման կարգը նուիրուած է Քրիստոսի մատնութեան և չարչարանքին: Ըստ աւանդութեան՝ եկեղեցւոյ բոլոր խորանները ծածկուած կ'ըլլան սեւ վարագոյրով ի նշան սուգի: Արարողութեան ընթացքին կը կարդացուին եօթ Աւետարաններ, որոնք կը բովանդակեն Յիսուսի Գեթսեմանի պարտէզին մէջ աղօթելը, մատնութիւնը, Յիսուսի ձեռբակալումը, չարաչարանքներն ու խաչելութիւնը: Օրուան խորհուրդին նուիրուած շարականներ կ'երգուին և սաղմոսներ կ'արտասանուին, որոնք առնչուած են Քրիստոսի երկրաւոր կեանքի վերջին հանգրուանին:


Քրիստոսի Թաղման Կարգ
Աւագ Ուրբաթ երեկոյեան՝ մեր Տիրոջ Յիսուսի Քրիստոսի Թաղման յիշատակին առիթով՝ երեկոյեան ժամերգութիւն կատարուեցաւ Զմմառու վանքի մայր տաճարին մէջ: Թաղման արարողութիւնը գլխաւորեց Զմմառու Պատրիարքական Միաբանութեան Փոխանորդ և վանքիս Մեծաւոր՝ Գերպծ. Հ. Գաբրիէլ Թ.Ծ.Վ. Մուրատեան, մասնակցութեամբ վարչական Հայրերուն, դպրեվանքի «Ս. Միքայէլ» և «Երանելի Մալոյեան» դպրեվանքերու ուսանողներուն, ինչպէս նաեւ բարեպաշտ հաւատացեալներու: Այս առթիւ՝ Զմմառու Տիրամօր մատրան մէջ զետեղուած էր խորհրդանշական ձեւով Յիսուսի գերեզմանը, որ վարդերով և անուշաբոյր ծաղիկներով զարդարուած էր: Արարողութեան ընթացքին ծնկաչոք կ'երգուի «Սուրբ Աստուածը» առանց «Փառաւորեալ»ի: Այնուհետեւ «Պարգեւատուն ամենեցուն» ողբագին շարականի երգեցողութեամբ՝ թափօրով կը դառնան վանքին շրջափակը, որմէ ետք, հաւատացեալները Յիսոսի դագաղին տակէն կ'անցնին:

Ճրագալոյց Ս. Զատկի
Աւագ Շաբաթ երեկոյեան՝ ճրագալոյց է,Աստուածաշունչի հատուածներ կը կարդացուին և մարգարէական գիրքերու ընթերցուածներ կ'երգուին, ապա Զատկուայ Ճրագալոյցի Սուրբ և Անմահ Պատարագ մատուցեց մայրավանքի Ա. Խորհրդական Գերյ. Հ. Անդրանիկ Ծ. Վրդ. Կռանեան: Հայր սուրբը, իր քարոզին մէջ անդրադառնալով Յարութեան խորհուրդին, ըսաւ. «Քառասնորդաց պահքէն ետք՝ սրտի անհուն գոհունակութեամբ կը դիմաւորենք Քրիստոսի հրաշափառ յարութիւնը: Այսօր՝ այս սուրբ խորանին առջեւ, Քրիստոսի Յարութեամբ մենք եւս կը ձերբազատուինք մեր մեղքերէն և կը զգենունք Յարուցեալին կենդանարար շնորհքը»: Սուրբ և Անմահ Պատարագի աւարտին՝ հաւատացեալները վանքի վարչութեան և դպրեվանքի սաներուն հետ վառած մոմերը իրենց ձեռքին ունենալով երգեցին «Այսօր յարեաւ» շարականը և իրար ողջունեցին՝գոչելով. «Քրիստոս յարեաւ ի մեռելոց»:

 

 

 

 

ԳԼԽԱՒՈՐ ԼՈՒՐԵՐ

  • ԶՄՄԱՌՈՒ ՊԱՏՐԻԱՐՔԱԿԱՆ ԿՂԵՐԻ ՄԻԱԲԱՆՈՒԹԵԱՆ Ս. ՄԻՔԱՅԷԼ ԸՆԾԱՅԱՐԱՆԻ ԱՆՈՒԱՆԱԿՈՉՈՒԹԵԱՆ ՏՕՆ
    ԶՄՄԱՌՈՒ ՊԱՏՐԻԱՐՔԱԿԱՆ ԿՂԵՐԻ ՄԻԱԲԱՆՈՒԹԵԱՆ Ս. ՄԻՔԱՅԷԼ ԸՆԾԱՅԱՐԱՆԻ ԱՆՈՒԱՆԱԿՈՉՈՒԹԵԱՆ ՏՕՆ

     

    Շաբաթ 11 Նոյեմբեր 2017-ի առաւօտեան ժամը 11-ին, Սրբոց հրեշտակապետացն՝ Գաբրիէլի, Միքայէլի և Ռափայէլի, Սերովբէից, Քերովբէից և ամենայն երկնային զօրացն տօնի առթիւ՝ նախագահութեամբ` Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Գրիգոր Պետրոս Ի. Կաթողիկոս – Պատրիարքի, Զմմառու Պատրիարքական Կղերի Միաբանութեան «Ս. Միքայէլ» դպրեվանքի անուանակոչութեան աւանդական տօնը տեղի ունեցաւ Զմմառու մայրավանքին մէջ:

  • Զմմառու վանք այցելեց Տիար Վարուժան Ներկիզեան:
    Զմմառու վանք այցելեց Տիար Վարուժան Ներկիզեան:

    Կիրակի 12 Նոյեմբեր 2017-ին, առաւօտեան  ժամը 10:30-ին, Զմմառու վանք այցելեց Տիար Վարուժան Ներկիզեան: Ան այս այցելութեան ընթացքին  մասնակցեցաւ Սուրբ և Անմահ Պատարագին, զոր մատոյց Զմմառու Պատրիարքական Կղերի Միաբանութեան Պատրիարքական Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վ. Մուրատեան, մայրավանքի մայր տաճարին մէջ:

  • Ժոզէֆ Եպս. Նաֆֆահ և Մարուն Եպս. Ամմար Զմմառու մէջ
    Ժոզէֆ Եպս. Նաֆֆահ և Մարուն Եպս. Ամմար Զմմառու մէջ

    Չորեքշաբթի 8 Նոյեմբեր 2017-ին, կէսօրին, Զմմառու վանք այցելեցին Հիւիսային Լիբանանի Էհտէն և Զղարթա գաւառներու Մարոնի Թեմի Պատրիարքական Փոխանորդ՝ Ժոզէֆ Եպս. Նաֆֆահ և Սայտայի Մարոնի թեմի Առաջնորդ՝ Մարուն Եպս. Ամմար:

  • Նէհմաթ Ֆրէմ Վանքին մէջ
    Նէհմաթ Ֆրէմ Վանքին մէջ

    Չորեքշաբթի 1 Նոյեմբեր 2017-ին, կէսօրին, Զմմառու վանք այցելեցին Լիբանանցի գործարար` Տիար Նէհմաթ Ֆրէմ և իր գործակիցը:

View All

inside picture