Շաբաթ 11 Օգոստոս 2018-ին, երեկոյեան ժամը 19:00-ին, Ս. Աստուածածնի Վերափոխման՝ Շողակաթի նաւակատիքի տօնին առթիւ՝ Զմմառու «Երանելի Մալոյեան» ամփիթատրոնին մէջ Զմմառու վանքի Փոխ Մեծաւոր՝ Հ. Անտոն Վրդ. Նորատունկեան հանդիսաւոր Ս. Պատարագ մատուցանեց:
Պատարագին իրենց մասնակցութիւնը բերին Զմմառու Պատրիարքական Կղերի Միաբանութեան Փոխանորդ՝ Հ. Գաբրիէլ Թ.Ծ. Վրդ. Մուրատեան, Գերյարգելի և Գերապատիւ Հայրեր, Զմմառու վանքի Վարչական Խորհուրդի Հայրեր և շրջակայ գիւղերէն ժամանած հաւատացեալներ: Ս. Խորանի սպասաւորութիւնը կատարեցին Հռոմի Լեւոնեան վարժարանի ժառանագաւորները և Զմմառու «Երանելի Մալոյեան» և «Ս. Միքայէլ» դպրեվանքի ժառանգաւորները: Պատարագիչ Հայրը իր քարոզին մէջ անդրադարձաւ Վերափոխման տօնի խորհուրդին՝ ըսելով թէ այդ մէկը հաւատքի ճշմարտութիւն է, զոր 1950-ին, Պիոս ԺՊ. Հռոմի սրբազան Քահանայապետը հռչակած է: Այսօր Քրիստոնէական Եկեղեցին իր հաւատացեալներով ինքզինք փառաւորուած կը տեսնէ Ս. Կոյսին մէջ: Սուրբ և Անմահ Պատարագի աւարտին՝ տեղի ունեցաւ աւանդական խաղողօրհնէքը և ապա յաւուր պատշաճի հիւրասիրութիւն կատարուեցաւ:
