Շաբաթ, 14 Դեկտեմբեր 2019-ի, երեկոյեան ժամը 5 ին, Սուրբ Եղիա-Սուրբ Գրիգոր Լուսաւորիչ եկեղեցւոյ մէջ տեղի ունեցաւ` Վարդան Սրկ. Ճալլուֆի եւ Պետրոս Սրկ. Հատտատ Մարաշլեանի քահանայական ձեռնադրութիւնը:

Ձեռամբ` Ամեն.եւ Գերերջանիկ Տէր Գրիգոր Պետրոս Ի. Կաթողիկոս-Պատրիարք` Տանն Կիլիկիոյ կաթողիկէ հայոց Հայրապետի:
Հոգեպարար արարողութենէն ետք նորօծ վարդապետները, Զմմառու Պատրիարքական կղերի Միաբանութեան Պէյրութի թեմի Պատրիարքական փոխանորդ եւ Զմմառու Վանքի Մեծաւոր` Գերապայծառ Գաբրիէլ Թ.Ծ.Վ.Մուրատեանը եւ նորօծեալներու ծնողները ընդունեցին ներկաներուն շնորհաւորանքները, որմէ ետք Սուրբ Խաչ եկեղեցւոյ սրահին մէջ` սիրոյ սեղանի շուրջ համախմբուեցան:

Հայր Վարդան (Պասէլ) Ճալլուֆ
Ծնած է 11 Յուլիս 1990-ին, Հալէպ – Սուրիա: Նախնական կրթութիւնը ստացած է տեղւոյն Հայ Կաթողիկէ Գրիգոր Լուսաւորիչ ճեմարանին մէջ, ապա Միքայէլ Քաշշուր, որմէ ետք պետական ուսումնարանէն ստացած է Պաքալորիան:
2012-ին ընդունուած է Զմմառու Պատրիարքական Կղերի Միաբանութեան Երանելի Իգնատիոս Մալոյեան դպրեվանքը:
2012-էն 2017 յաջողութեամբ աւարտած է Պօղոսեան Հայրերու կաճառի իմաստասիրական եւ Աստուածաբանական բաժանմունքները:
Յետ պատրաստողական շրջանի դասընթացքին, 14 սեպտեմբեր 2019-ին Սարկաւագ ձեռնադրուած է:

Հայր Պետրոս Մարաշլեան Հատտատ
Ծնած է 24 Մարտ 1993-ին, Հալէպ- Սուրիա:
30 Սեպտեմբեր 2007-ին ընդունուած է Հալէպի Զմմառեան Ս. Միքայէլ փոքր ընծայարանը, զուգահեռ յաճախելով Լազար Նաճարեան, Գալուստ Կիւլպենկեան Ճեմարանը ուրկէ Պետական Պաքալորիան ստացած: 1 Օգոստոս 2011-ին ընդունուած է Զմմառու Պատրիարքական Կղերի միաբանութեան՝ Երանելի Իգնատիոս Մալոյեան Դպրեվանքը։
30 Սեպտեմբեր 2012-ին, մեկնած է Հռոմ ուր յաջողութեամբ աւարտած է Գրիգորեան համալսարանի՝ իմաստասիրական եւ Աստուածաբանական բաժանմունքները։
1 Օգոստոս 2018-ին, վերադարձած՝ Զմմառ: Յետ պատրաստողական շրջանի դասընթացքներուն 14 Սեպտեմբեր 2019-ին ձեռնադրուած է Սարկաւագ։